Left arrow Mur Lura

Jum Ewropew tal-Ġenituri u l-Iskejjel

PR1380
Date Icon 08/10/2002

Aktar minn 70 skola primarja u sekondarja illum ħadu sehem f'diversi attivitajiet biex ifakkru "Il-Jum Ewropew tal-Ġenituri u l-Iskejjel". Din is-sena hi l-ewwel darba li qed ikun iċċelebrat dan il-jum kemm f'Malta kif ukoll fid-diversi pajjiżi Ewropej li ssieħbu f'din l-inizjattiva tal-Għaqda Ewropea tal-Ġenituri. Il-Ministru ta' l-Edukazzjoni Louis Galea żar numru ta' skejjel ta' l-Istat u tal-Knisja li organizzaw attivitajiet interessanti ħafna bil-parteċipazzjoni tal-ġenituri.

Il-Programm għal dan l-ewwel "Jum Ewropew tal-Ġenituri u l-Iskejjel" qed ikun ikkordinat mill-Office of Review tal-Ministeru ta' l-Edukazzjoni. L-iskejjel kollha intalbu jorganizzaw attivitajiet marbuta ma' din il-ġurnata bil-parteċipazzjoni sħiħa tal-ġenituri tat-tfal li jattendu dik l-iskola. L-attivitajiet kienu jinkludu:

    • Seminars/wokshops u taħdidiet edukattivi għall-ġenituri (ir-rwol tal-ġenituri fl-iskejjel); l-abbuż tad-droga; il-qari u sehem il-ġenituri; l-assessjar u l-eżamijiet; it-trobbija ta’ l-ulied; paired reading; dixxiplina; l-importanza tal-logħob fl-edukazzjoni bikrija
    • Ftuh ta’ librerija għall-genituri
    • Open Days, Exhibitions u kunċerti
    • Ftuh ta’ kmamar għall-ġenituri
    • Attivita’ kulturali

L-iskop ewlieni ta' dawn l-attivitajiet hu biex il-ġenituri jkomplu jifhmu dejjem aktar l-importanza li jieħdu sehem attiv fil-ħajja edukattiva ta’ uliedhom. Bħala parti mill-attivitajiet li qed jiġu organizzati, ser ssir Konferenza Nazzjonali għall-ġenituri u l-għalliema bit-tema "Insaħħu dak li bdejna għall-ġid ta’ uliedna." nhar is-Sibt 12 t’Ottubru 2002, fil-Lukanda New Dolmen, Qawra.

Il-Ministru Louis Galea iltaqa' ma' numru kbir ta' ġenituri li attendew l-attivitajiet organizzati mill-iskejjel Sir Adrian Dingli Junior Lyceum, id-Dorotei f'Ħaż-Żebbuġ, il-primarja St. Benedict ta' Ħal Kirkop u l-primarja ta' Ħal Għaxaq.

Fl-iskola Sir Adrian Dingli, il-ġenituri kienu mistiedna biex flimkien mat-tfal tagħhom jaraw il-blokk li għadu kemm ġie irrinovat din is-sena. Il-ġenituri setgħu ukoll jaraw xi xogħol li qed jagħmlu t-tfal tagħhom fl-iskola. Waqt l-assemblea tkellmu kemm il-ġenituri kif ukoll l-għalliema u t-tfal stess. Il-Ministru f'diskors li għamel qal li biex l-edukazzjoni tirnexxi hemm bżonn il-parteċipazzjoni u l-involviment tat-tliet partijiet - il-ġenituri, l-istudenti u l-għalliema - u dan hu fil-fatt dak li jisħaq il-Kurrikulu Nazzjonali. Il-Ministru qal li kemm il-Kunsill Nazzjonali għall-Kurrikulu kif ukoll id-diversi Focus Groups (partikolarment dak dwar l-involviment tal-ġenituri) qed jaħdmu biex dak li jingħad fil-kurrikulu jibda jseħħ fl-iskejjel tagħna.

Fl-iskola tad-Dorotei, il-Ministru ra diversi xogħlijiet li ittellgħu mit-tfal u l-għalliema u tkellem mal-ġenituri li attendew sessjonijiet minn counsellor u mill-ġenituri stess. Waqt iż-żjara tal-Ministru, il-ġenituri u t-tfal kienu qed jieklu ikel ippreparat mill-ġenituri stess għal din l-okkażjoni.

Fl-iskola Primarja ta' Ħal Kirkop, il-Ministru attenda sessjoni li kienet qed issir għall-ġenituri dwar il-qari għat-tfal iż-żgħar. Il-Ministru kellu l-opportunita' jitkellem mal-ġenituri dwar l-importanza tal-qari u kemm hu importanti li jipprovdu kotba għat-tfal u joqogħdu magħhom meta jaqraw.

Il-Ministru faħħar b'mod partikolari lill-ġenituri li attendew fl-iskola ta' Ħal Għaxaq fejn l-attendenza kienet waħda sabiħa ħafna. Il-Ministru qal li l-parteċipazzjoni fl-attivitajiet organizzati f'dan l-ewwel "Jum Ewropew tal-Ġenituri u l-Iskejjel" turi r-rieda ta' kull min hu involut fil-proċess edukattiv li jissieħeb għall-ġid tat-tfal.

Ixxerja din l-istqarrija Icon socials Icon socials Icon socials Icon socials

Stqarrijiet Oħra:

PRESS RELEASE BY THE NATIONAL AUDIT OFFICE  National Audit Office Malta hosts bilateral meeting with the Spanish Court of Audit

PR261929

PRESS RELEASE BY THE NATIONAL AUDIT OFFICE National Audit Office Malta hos...

STQARRIJA MILL-UFFIĊĊJU TAL-PRIM MINISTRU  “Sodisfatt bil-qbil bejn il-mexxejja tal-UE għax Malta ilha mill-bidu nett timbotta favur soluzzjoni għall-paċi” – Il-Prim Ministru Robert Abela

PR261926

STQARRIJA MILL-UFFIĊĊJU TAL-PRIM MINISTRU “Sodisfatt bil-qbil bejn il-mexx...

Aktar Stqarrijiet Right arrow