STQARRIJA MID-DIPARTIMENT TAL-LOTTU PUBBLIKU
Wara l-istqarrija ta' l-Għaqda tar-Riċevituri tal-Lottu li dehret f'ċerta sezzjonijiet ta' l-istampa tas-Sibt 28 ta' Settembru 2002, dwar 'hold-up' fuq il-Banka tal-Lottu tan-Naxxar, l-Aġent Direttur tal-Lottu Pubbliku jixtieq jagħmilha ċara li d-Dipartiment ġa ħa l-passi kollha meħtieġa biex tingħata iżjed attenzjoni lil din il-problema.
Fil-fatt, id-Dipartiment gie assigurat minn naħa ta' l-Awtoritajiet tal-Pulizija li għal nhar l-Erbgħa 2 t'Ottubru 2002 u għal drabi oħra simili fil-ġejjieni, il-pulizija sejra zzid il-mezzi ta' sigurtà sabiex tipprovdi aktar protezzjoni kemm lir-Ricevituri tal-Lottu kif ukoll lill-pubbliku in generali.
B'referenza għall-kumplament ta' l-istqarrija dwar is-somma ta' Lm50,000 li kienet twegħdet għal sistema ta' sigurtà fil-Banek tal-Lottu, hija ħasra li l-Għaqda tar-Riċevituri tal-Lottu (LRU) għadha ma implimentatx is-sistema li kienet ġiet miftehma mad-Dipartiment tal-Lottu Pubbliku żmien ilu. L-Ghaqda tar-Ricevituri tal-Lottu ilha biex tagħmel dan minn April ta' 2001.
Ghalhekk id-Dipartiment jiskanta kif il-President tal-LRU joħroġ jagħmel stqarrija fejn qal li t-taħdidiet fuq dan is-suġġett kienu miżmuma. Dan mhux il-każ. Il-Gvern qabel mas-Sistema ta' Sigurtà li fuqha kien intlaħaq ftehim u għalhekk ir-responsabbiltà issa qeghda fuq l-Ghaqda tar-Ricevituri tal-Lottu. Jekk issa wara dan iż-żmien kollu l-Ghaqda LRU reġà bdilhom, fuq il-ftehem li kien intlaħaq, għandhom jgħidu l-fatti kif inhuma.
Il-Gvern għadu ppreparat li jiffinanzja din l-inizjattiva b'Lm50,000 (ħamsin elf lira Maltin) sakemm din l-inizjattiva tkun toffri s-sigurtà meħtieġa u tkun għas-sodizfazzjon tar-Riċevituri tal-Lottu.
Sadanittant, id-Dipartiment tal-Lottu Pubbliku jixtieq ukoll jinforma lill-pubbliku li l-ammont misruq mill-Banka tal-Lottu tan-Naxxar fil-25 ta' Settembru 2002, huwa fil-fatt ħafna anqas miċ-ċifra ta' Lm5,000, kif kienet irrappurtata fil-medja ta' nhar il-Hamis, 26 ta' Ottubru 2002.
Other Press Releases:
PR261929
PRESS RELEASE BY THE NATIONAL AUDIT OFFICE National Audit Office Malta hos...
PR261926