Left arrow Mur Lura

Stqarrija mis-Segretarju Parlamentari fil-Ministeru tas-Servizzi Ekonomici, l-Onor. Edwin Vassallo, b’risposta ghal stqarrija mahruga mill-Partit Laburista dwar is-Self Employed

PR1332
Date Icon 02/10/2002

In-numru ta’ applikazzjoniet għall-liċenzji tan-negozji ġodda fl-ewwel 4 xhur ta’ l-operat tat-Trade Licensing Unit kien ta’ 457 minn total ta’ 867 applikazzjoni li daħlu sabiex jiġu pproċessati f’dan id-Dipartiment il-ġdid fid-Diviżjoni tal-Kummerċ. Dan hu riżultat ta’ eżerċizju li fih tnaqqset il-burokrazija.

Dan in-numru ta’ liċenzji tan-negozju ġodda f’4 xhur, huwa iżjed minn numru tal-liċenzji tan-negozji kollha li ġew ipproċessati f’kull sena, f’dawk is-sentejn li fihom kien Prim Ministru Dr. Alfred Sant. Jekk f’dan il-pajjiż il-Partit Laburista jrid jitkellem ‘fuq negozju sejjer ħażin’, żgur li l-ebda self employed ma jista’ jinsa s-sentejn tal-Gvern precedenti li f’dawn l-aħħar sitt snin kienu l-aghar sentejn ghal kull min kien fin-negozju.

Tant hu hekk li fl-1997 kienu ħarġu 418 licenzja tan-negozju u fl-1998 kienu nħarġu 388 liċenzja tan-negozju. Illum, meta skond l-Oppozizzjoni Laburista m’hawnx flus fl-idejn, minn April sa Awissu biss ta’ din is-sena, kien hemm talba ghal 457 applikazzjoni għal-liċenzja ġdida tan-negozju.

F’dan iż-żmien ukoll li fih il-Partit ta’ l-Oppożizzjoni qed isostni li m’hawnx flus fl-idejn, l-importazzjoni għall-konsum lokali żdiedet bi 11-il miljun u laħqet Lm192.4 miljun. L-importazzjoni ta’ prodotti f’kull settur tal-konsum lokali zdied meta mqabbel ma’ l-istess perjodu tas-sena l-ohra.

Fis-settur ta’ l-ikel u x-xorb, l-importazzjoni għall-perjodu ta’ Jannar sa Awissu tas-sena 2001 kienet ta’ Lm61.6 miljun lira filwaqt li fl-istess perjodu ta’ din is-sena, l-importazzjoni laħqet Lm64.1 miljun lira, jiġifieri żieda ta’ 2.5 miljun lira.

L-importazzjoni f’durable goods għall-perjodu ta’ Jannar sa Awissu tas-sena 2001 kienet ta’ 76.9 miljun lira filwaqt li għall-istess perjodu ta’ din is-sena l-importazzjoni telat ghall-78.1 miljun lira, li tfisser żieda ta’ 1.2 miljun lira.

L-importazzjoni ta’ oġġetti oħra għall-konsum lokali għall-perjodu ta’ Jannar sa Awissu tas-sena 2001 kienet Lm 42.8 miljun lira, filwaqt li għall-istess perjodu ta’ din is-sena, l-importazzjoni telgħat għall-50.2 miljun lira jiġifieri żieda ta’ 7.4 miljun lira.

Din l-informazzjoni li hi skond l-Uffiċċju Nazzjonali għall-Istatistika tixhed li għall-kuntrarju ta’ dak li qiegħed jgħid il-Partit Laburista, fil-pajjiż negozju hawn u flus fl-idejn hawn ukoll. Li kieku ma kienx hekk, kieku l-importazzjoni ta’ affarijiet għal konsum lokali ma kienetx tiżdied kif fil-fatt għamlet.

L-isfida iżda hija, li kull min hu fin-negozju qiegħed jiffaċċja kompetizzjoni, u dan għax in-numru tan-negozji qiegħed jiżdied kompletament. Dan qed iwassal biex kull min qed jinvesti u jirranġa in-negozju biex jilqa’ għall-kompetizzjoni qed jirnexxi fin-negozju tiegħu. Dan ġie sostnut ukoll mill-kummenti li ħarġu mill-istess sidien ta’ ħwienet ġewwa Paceville li komplew jikkonfermaw li fil-kompetizzjoni li qed tiżdied, jekk wieħed irid jirnexxi jrid timmodernizza n-negozju tiegħu, u dawk li m’għamlux hekk waqgħu lura fit-tellieqa tal-kompetizzjoni.

Il-fatt li qed tiżdied il-kompetizzjoni kif ukoll il-liċenzji tan-negozju, jixhdu li għall-kuntrarju li qed jgħid il-Partit Laburista, flus fl-idejn hawn u n-negozju fuq livell nazzjonali qiegħed jiżdied ukoll.

Fil-laqgħat tiegħu mas-self employed, il-Partit Laburista għandu l-opportunità li juri kemm hu serju billi jghid il-verità u jikkummenta fuq ir-rejaltà kif inhi. Jekk irid juri li hu serju, lis-self employed li jkollu quddiemu, għandu jiggwidahom sabiex ma jibqgħux iħarsu biss kif sejrin individwalment, iżda jkollu l-kuraġġ juri l-isfidi vera minn fejn ġejjin. L-istqarrija tal-Partit Laburista tixhed li f’dawn il-laqgħat, il-Partit Laburista qiegħed jinqeda bil-kummenti ta’ whud mis-self employed u jipprova jagħti l-impressjoni li r-realtà hija waħda u għal kulħadd l-istess.

Il-Gvern qed jagħmel min kollox biex joħloq l-aħjar ċirkustanzi possibbli fejn in-negozju jkun jista’ jikber, fost ohrajn billi jnaqqas l-burokrazija u jara li jkompli jiżviluppa l-politika imprenditorjali li ttejjeb iċ-ċirkustanzi u l-ambjent li fihom qed jaħdem is-self employed.

Ixxerja din l-istqarrija Icon socials Icon socials Icon socials Icon socials

Stqarrijiet Oħra:

PRESS RELEASE BY THE NATIONAL AUDIT OFFICE  National Audit Office Malta hosts bilateral meeting with the Spanish Court of Audit

PR261929

PRESS RELEASE BY THE NATIONAL AUDIT OFFICE National Audit Office Malta hos...

STQARRIJA MILL-UFFIĊĊJU TAL-PRIM MINISTRU  “Sodisfatt bil-qbil bejn il-mexxejja tal-UE għax Malta ilha mill-bidu nett timbotta favur soluzzjoni għall-paċi” – Il-Prim Ministru Robert Abela

PR261926

STQARRIJA MILL-UFFIĊĊJU TAL-PRIM MINISTRU “Sodisfatt bil-qbil bejn il-mexx...

Aktar Stqarrijiet Right arrow