Left arrow Mur Lura

It-tisbiħ tal-promenade ta’ San Ġiljan jitlesta qabel is-sajf

PR1308
Date Icon 26/09/2002

Meta kien qed jindirizza laqgha pubblika dwar l-ahhar fazi ta’ tisbih tal-promenade ta’ San Giljan u inawgura s-sistema gdida ta’ dawl dekorattiv fl-istess promenade, il-Ministru għar-Riżorsi u l-Infrastruttura, l-Onor. Dr. Francis Zammit Dimech qal li kien ta’ unur għalih li beda jwettaq f’pajjiżna proġetti ta’ tisbiħ meta fl-1996 f’Marsaskala, b’investiment ta’ aktar minn Lm2 miljun, inbidlet is-sistema tad-drenaġġ u nbena mill-ġdid il-promenade tul Triq ix-Xatt. Hu qal li dawn il-proġetti komplew taħt il-Gvern preċedenti u ssuktaw taħt dan il-Gvern biex illum nistgħu niftaħru li sebbaħna l-promenades ta’ Marsaskala, Marsaxlokk, Birżebbuġa, Bugibba, il-Qawra, ix-Xatt tal-Gzira, il-Ġnejna, Għar Lapsi, il-bajja ta’ San Tumas, Tas-Sliema u San Ġiljan.

Francis Zammit Dimech qal li f’tas-Sliema ġie msebbaħ kilometru u nofs ta’ promenade li anke tkabbar b’50 fil-mija ta’ dak li kien, biex in-nies ikollhom aktar spazju fejn jippassiġaw. F’San Ġiljan qed ikun immeljorat kilometru ieħor ta’ promenade. Hekk, darba dan il-promenade jitlesta minn kollox sa qabel is-sajf li ġej, ikun hemm żewġ kilometri u nofs ta’ promenade li matulhom ikunu jistgħu jsiru l-passiġġati. Il-quddiem dawn iż-żewġ promenades għad iridu jingħaqdu mal-promenade tax-Xatt tal-Gżira meta titlesta l-parti tal-Ponta ta’ Tigne tal-progett ta’ Manoel Island u Tigne’.

Il-Ministru Francis Zammit Dimech qal li t-tisbiħ ta’ dawn il-promenades kien qed jagħti dehra ġdida lill-pajjiżna u jgħolli l-prodott li noffru lis-settur turistiku. Hu qal li fl-ippjanar tal-proġetti li qed jitwettqu qed isir minn kollox biex ma jkun hemm xejn li jistona u għalhekk qed nidħlu fid-dettal biex kull parti tal-proġett tkun taqbel mhux biss mal-promenade ta’ San Ġiljan iżda anke ma’ dak ta’ Tas-Sliema biex ikun hemm dik il-kontinwita’ u konformita’ li kulħadd ikun jixtieq meta jkun qed jippassiġġja.

Francis Zammit Dimech fakkar li s’issa diġa kienu twettqu tliet fażijiet tal-proġett ta’ tisbiħ tal-promenade ta’ San Ġiljan. Hu qal li l-ewwel fażi kopriet il-parti tal-promenade minn ħdejn iċ-Chains sa’ quddiem Trejqet Grenfell filwaqt li t-tieni fażi kienet tikkonsisti f’tisbiħ tal-promenade sa ħdejn il-pitch tal-waterpolo tan-Neptunes. Hawnhekk sar xogħol strutturali estensiv sew fuq l-art kif ukoll fil-baħar biex twessgħet it-triq bejn iż-żewġ pitches. F’din il-fażi sar ukoll xogħol fuq wiċċ it-triq, servizzi ġodda u bankina ġdida n-naħa tar-residenti. It-tielet fażi kienet tkopri l-bini mill-ġdid tal-waterpolo pitch ta’ San Ġiljan.

Il-Ministru għar-Riżorsi u l-Infrastruttura qal li fil-ġimgħat li ġejjin se tibda l-aħħar fażi tat-tisbiħ. Din tinkludi t-tisbiħ ta’ bejn il-waterpolo club tan-Neptunes u l-Barracuda. Il-Ministru Francis Zammit Dimech qal li irid isir ukoll xogħol fuq il-wiċċ tat-triq u s-servizzi relatati sa fejn Pjazza Balluta. Hu qal li se jibdew ukoll ix-xogħlijiet fi Triq Wied Għomor u Triq Forrest u se jissuktaw il-preparamenti għax-xogħlijiet li jridu jsiru fi Pjazza Spinola u Triq San Ġorġ.

Il-Ministru Francis Zammit Dimech qal li fil-proġett tat-tisbiħ tal-promenade ta’ tas-Sliema/San Ġiljan diġa sar investiment ta’ Lm1.7 miljun. Hu fakkar li ħafna mix-xogħol twettaq minn ħaddiema ta’ diversi sezzjonijiet tal-Ministeru għar-Riżorsi u l-Infrastruttura li fil-ħidma tagħhom urew professjonalita’ kbira.

Il-Ministru għar-Riżorsi u l-Infrastruttura qal li ried jieħu din l-okkażżjoni biex jinawgura s-sistema ta’ dwal dekorattivi tul il-promenade ta’ San Ġiljan. Hu qal li dawn kienu dwal b’differenza. Ma kienux il-soltu globi li faċli jiġu vandalizzati. Fl-istess waqt kienu dwal li jnaqqsu ħafna mit-tniġġiż mid-dawl – light pollution - li joħolqu skemi oħra ta’ dwal dekorattivi. Hu qal li kien fil-proġett tal-promenade ta’ tas-Sliema li ġew installati għall-ewwel darba dwal kontra light pollution u li issa qed isir l-istess fil-promenade ta’ San Ġiljan.

Ixxerja din l-istqarrija Icon socials Icon socials Icon socials Icon socials

Stqarrijiet Oħra:

PRESS RELEASE BY THE NATIONAL AUDIT OFFICE  National Audit Office Malta hosts bilateral meeting with the Spanish Court of Audit

PR261929

PRESS RELEASE BY THE NATIONAL AUDIT OFFICE National Audit Office Malta hos...

STQARRIJA MILL-UFFIĊĊJU TAL-PRIM MINISTRU  “Sodisfatt bil-qbil bejn il-mexxejja tal-UE għax Malta ilha mill-bidu nett timbotta favur soluzzjoni għall-paċi” – Il-Prim Ministru Robert Abela

PR261926

STQARRIJA MILL-UFFIĊĊJU TAL-PRIM MINISTRU “Sodisfatt bil-qbil bejn il-mexx...

Aktar Stqarrijiet Right arrow