Left arrow Mur Lura

DISKORS MILL-ONOR EDDIE FENECH ADAMI, PRIM MINISTRU, FL-OKKAŻJONI TAS-36 ANNIVERSARJU MIT-TWAQQIF TAL-UNION ĦADDIEMA MAGĦQUDIN – FLORIANA - IL-ĦAMIS, 26 TA’ SETTEMBRU 2002

PR1305
Date Icon 26/09/2002

Huwa ta’ pjaċir kbir għalija li nindirizza dan il-Kunsill Ġenerali tal-Union, Kunsill li jiġbor fih l-elementi l-aktar importanti fit-teħid tad-deċiżjonijiet u fit-tfassil tal-politika u strateġija li fuqha titmexxa l-Union Ħaddiema Magħqudin.

Fil-ftit ħin li għandi għad-dispożizzjoni tiegħi nixtieq nibda billi nirreferi għal dak li, fl-opinjoni tiegħi, għandu jkun ċentrali fit-twettieq ta` politika li tkompli tħares l-interessi tal-ħaddiema, filwaqt li tistimola l-iżvilupp ta` kwalità ta` ħajja aħjar għas-soċjetà Maltija permezz ta` l-iżvilupp ekonomiku u soċjali ta` pajjiżna.

Ċertament, l-aħħar xhur kienu xhur ta` sfida għall-pajjiżna, mod partikolari għall-Unions. Flimkien għexna esperjenzi li ppreżentawlna numru ta` sfidi, liema sfidi jien kuntent li l-Gvern tiegħi irnexxielu jibdel b`suċċess f`opportunitajiet.

Pajjiżna mhuwiex gżira mwarrba mir-realtajiet ekonomiċi u soċjali li huma frott tal-proċess ta` globalizzazzjoni. Pajjiżna jagħmel parti minn dinja waħda, u dak li jiġri lil hinn minn xtutna ħafna drabi jolqotna fil-laħam il-ħaj. Ir-ristrutturar ekonomiku u industrijali, it-tnaqqis fir-ritmu ta` tkabbir tal-ekonomija globali minħabba diversi fatturi, il-bżonn li jiġi kontrollat id-deficit, is-sostenibbiltà tas-sistema tal-welfare f`pajjiżna, ir-ristrutturar fit-tarznari, it-tfassil ta` mudell ġdid għad-djalogu soċjali, l-aġġornament radikali tal-liġijiet tax-xogħol u dawk dwar ir-relazzjonijiet industrijali, il-liberalizzazzjoni ta` l-ekonomija Maltija – dawn huma kollha sfidi li flimkien sarrafnihom f`inizjattivi biex intejbu l-kwalità tal-ħajja tal-Maltin u l-Għawdxin.

Dawn huma kollha esperjenzi li ġabuna flimkien sabiex insibu soluzzjonijiet komuni għal ġid ta` pajjiżna mingħajr ma jiġu mittiefsa d-drittijiet tal-ħaddiema, anzi dejjem bl-intenzjoni li ngħollu l-kwalità ta` l-ħajja. Dawn l-esperjenzi naħseb li komplew il-proċess ta` maturazzjoni tad-djalogu soċjali f`Malta. Permezz tal-Kunsill Malti Għall Iżvilupp Ekonomiku u Soċjali, issa għandna għodda aħjar biex id-djalogu soċjali jimxi `l hinn minn dak tradizzjonali konfrontattiv, għal wieħed li jħares aktar lejn il-bżonn ta` azzjoni komuni sabiex jintlaħqu l-miri strateġiċi tal-Gvern. Huwa mudell li nistqarr li għadu qed jiżviluppa, madankollu, l-ewwel ftit xhur ta` tħaddim ta` dan il-mudell huma indikazzjoni tajba li din il-viżjoni tista` tintlaħaq, u tintlaħaq fi żmien qasir.

Minn qatt kien joħlom li l-liġi ġdida dwar ir-relazzjonijiet industrijali u ta` l-impjieg kienet ser tiġbor magħha l-konsensus tal-partijiet soċjali kollha? Għal għaxar snin sħaħ, il-Unions u l-Għaqdiet ta` Min Iħaddem kellhom differenzi kbar bejniethom, tant li ma kienx possibbli li jiġi ppreżentat abbozz komuni lill-Gvern. Madankollu, il-Gvern ha l-inkarigu li jġib flimkien lil dawn iż-żewġ partijiet b`tali mod li llum għandna abbozz ta` liġi li jgawdi l-qbil ta` kulħadd, b`mod partikolari it-Trejd Unions u l-Għaqdiet ta` Min Iħaddem.

Kull Union madwar id-dinja u speċjalment fl-Ewropa, qiegħda tfittex mezzi ġodda kif tista` tirrapreżenta l-membri tagħha, mezzi li jirrispondu aktar għar-rejaltajiet soċjali, ġodda tal-post tax-xogħol. F`pajjiżna wkoll qed naraw l-introduzzjoni ta` forom, metodi u proċeduri ġodda ta` xogħol, liema oqsma jridu jiġu ndirizzati b`mod effettiv minn naħa tal-Unions.

Ir-rata li biha n-nisa jinsabu deħlin fid-dinja tax-xogħol hija waħda mgħaġġla. F`Settembru tal-1998, ir-rata tal-parteċipazzjoni tan-nisa fis-suq tax-xogħol kienet ta` 26.8%, filwaqt li f`Mejju ta` l-2002 din ir-rata telgħet għal 29.3%. Dan iġib miegħu bżonnijiet ġodda, flessibiltà aktar, u l-bżonn ta` strutturi aħjar sabiex jirrispondu għar-rejaltajiet soċjali tal-mara.

Il-Gvern diġà fassal l-istrateġija tiegħu, kemm permezz tal-Joint Assessment Paper mal-Kummissjoni Ewropea, kif ukoll permezz ta` għadd ta` miżuri ġodda li qed jiġu ntrodotti permezz tal-liġijiet ġodda dwar l-impjiegi, dwar is-saħħa u s-sigurtà fuq il-post tax-xogħol u dwar l-ugwaljanza bejn l-irġiel u n-nisa. Għaldaqstant, il-Unions iridu wkoll jirrispondu għal din ir-rejaltà permezz ta` mekkaniżmi aktar rappreżentattivi kemm f`dawk li għandu x`jaqsam mat-tmexxija tal-Union, kif wkoll f`dak li jirrigwarda n-negozjar ta` kundizzjonijiet tax-xogħol ta` ħaddiema.

Nagħlaq l-intervent tiegħi hawn. Il-futur qiegħed isejħilna sabiex nagħmlu deċiżjoni importanti għall-pajjiżna – deċiżjoni tant importanti li jeħtieġ li nirriflettu sewwa fuq il-konsegwenzi li nistgħu naffaċċjaw ġaladarba nkunu ħadna deċiżjoni ħażina. Is-sħubija fl-Unjoni Ewropea hija l-aqwa triq li l-Gvern jemmen li l-poplu Malti għandu jimxi sabiex ikattar il-prosperità u jibni futur b`suċċess. Il-UHM għandha l-obbligu għalhekk li tispjega lill-membri t-twemmin tagħha fuq l-impatt li s-sħubija jkollha fuq il-ħaddiema u l-familja Maltija. Il-Gvern jemmen bis-sħiħ li l-vantaġġi ta` sħubija jiżbqu bil-wisq l-iżvantaġġi. Ninsab ċert li anki l-UHM waslet għal din il-konklużjoni. Nittama u nħeġġeġ sabiex il-UHM tkompli tikkomunika mal-membri tagħha sabiex tgħinhom jgħażlu l-aħjar futur għalihom u għal uliedhom.

Ixxerja din l-istqarrija Icon socials Icon socials Icon socials Icon socials

Stqarrijiet Oħra:

PRESS RELEASE BY THE NATIONAL AUDIT OFFICE  National Audit Office Malta hosts bilateral meeting with the Spanish Court of Audit

PR261929

PRESS RELEASE BY THE NATIONAL AUDIT OFFICE National Audit Office Malta hos...

STQARRIJA MILL-UFFIĊĊJU TAL-PRIM MINISTRU  “Sodisfatt bil-qbil bejn il-mexxejja tal-UE għax Malta ilha mill-bidu nett timbotta favur soluzzjoni għall-paċi” – Il-Prim Ministru Robert Abela

PR261926

STQARRIJA MILL-UFFIĊĊJU TAL-PRIM MINISTRU “Sodisfatt bil-qbil bejn il-mexx...

Aktar Stqarrijiet Right arrow