Left arrow Go Back

Għajnuna lil proċessuri ta’ prodotti tal-laħam

PR1298
Date Icon 25/09/2002

Il-Gvern se jgħin finanzjarjament lill-proċessuri ewlenin ta’ prodotti tal-laħam bl-iskop li dawn iġeddu l-impjanti tal-produzzjoni tagħhom biex jilħqu l-ogħla standards ta’ sigurtà fl-ikel u iġene. Din l-għajnuna mistennija tammonta għal kważi miljun lira.

Dan ħabbru l-Ministru għall-Agrikultura u Sajd, l-Onor. Ninu Zammit meta dalgħodu żar l-impjant tal-kumpanija Chef Choice Ltd., f’Marsaskala. Din il-kumpannija, li tipproduċi u tissupplixxi diversi prodotti tal-laħam u t-tjur, qed tinvesti aktar minn nofs miljun lira biex timmodernizza l-impjant bl-iskop li tilqa’ sfidi ġodda li għandha quddiemha, inkluża l-possibbiltà ta’ esportazzjoni.

Il-Ministru Zammit qal li f’dawn l-aħħar snin il-Gvern ħa diversi inizjattivi, inklużi liġijiet ġodda, bl-iskop li jtejjeb il-proċess kollu tal-prodott ta’ l-ikel minn meta jitkabbar sakemm jasal għand il-konsumatur.

Hu żied li, fil-qasam tal-produzzjoni ta’ l-ikel, l-istess produtturi qed jifhmu li jridu jtejbu l-operat u l-kwalità tal-prodott tagħhom biex mhux biss lill-konsumatur joffrulu prodotti varji u ta’ l-ogħla kwalità, iżda wkoll biex isiru aktar kompetittivi.

Il-Ministru Zammit qal li jieħu gost jara kumpaniji bħal ma hi Chef Choice Ltd., jinvestu bil-qawwi biex iġeddu l-impjanti tagħhom u jintroduċu teknoloġija mill-aktar moderna fil-qasam tal-produzzjoni. Hu qal li dan juri li dawn il-kumpaniji għandhom fiduċja fihom infushom u fil-futur tagħhom.

Min-naħa tiegħu, kompla l-Ministru Zammit, il-Gvern se jgħin lil dawn il-kumpaniji f’dan it-tiġdid. Għal dan l-iskop sar eżerċizzju biex isir magħruf it-tibdil li jrid isir fl-impjanti ta’ 13-il proċessur ewlieni tal-laħam f’Malta, kemm fir-rigward ta’ tibdil infrastrutturali kif ukoll tiġdid tal-makkinarju użat għall-ipproċessar. Dawn il-kumpaniji jħaddmu bejniethom aktar minn 300 ħaddiem. Dan l-eżerċizzju sar bl-għajnuna ta’ konsulenti barranin esperti f’dan il-qasam.

It-tiġdid meħtieġ, żied il-Ministru Zammit, għandu jsir sas-sena d-dieħla u għandu jwassal għat-tisħiħ fil-livelli ta’ sigurtà fl-ikel u iġene.

Il-Ministru Zammit faħħar lill-kumpannija Chef Choice għall-investiment qawwi li qed tagħmel biex tippromwovi l-prodotti tagħha anki għas-suq barrani u awgura li jkollha suċċess fil-parteċipazzjoni tagħha fil-Fiera ta’ Sial fi Franza x-xahar id-dieħel kif ukoll fil-ħidma tagħha biex tesporta lejn pajjiżi Għarab.

Share this Press Release Icon socials Icon socials Icon socials Icon socials

Other Press Releases:

PRESS RELEASE BY THE NATIONAL AUDIT OFFICE  National Audit Office Malta hosts bilateral meeting with the Spanish Court of Audit

PR261929

PRESS RELEASE BY THE NATIONAL AUDIT OFFICE National Audit Office Malta hos...

STQARRIJA MILL-UFFIĊĊJU TAL-PRIM MINISTRU  “Sodisfatt bil-qbil bejn il-mexxejja tal-UE għax Malta ilha mill-bidu nett timbotta favur soluzzjoni għall-paċi” – Il-Prim Ministru Robert Abela

PR261926

STQARRIJA MILL-UFFIĊĊJU TAL-PRIM MINISTRU “Sodisfatt bil-qbil bejn il-mexx...

More Press Releases Right arrow