Left arrow Go Back

L-EWWEL ĠURNATA TA' L-ISKOLA GĦAL ELUF TA' STUDENTI

PR1290
Date Icon 24/09/2002

Il-bierah bdew l-iskola aktar minn 42,000 student fl-iskejjel primarji (77 skola) u sekondarji (34 skola) ta' l-istat. Minn dawn, ftit aktar minn nofs - 21,630 - huma subien, filwaqt li 20,650 huma bniet. Fl-iskejjel primarji hemm ma' l-20,000 student li minnhom 10,720 huma subien u 9,350 bniet, filwaqt li fl-ewwel ta' Ottubru jidħlu ukoll it-tfal tal-kindergartens li jlaħħqu mal-5000 student. 17,000 student bdew il-livell sekondarju b'7,290 fil-Junior Lyceums u 9,740 fl-iskejjel sekondarji. Din is-sena f'Ottubru se jidħlu għall-ewwel darba: 1660 fil-kindergarten, 3,120 fil-primarji, 1,360 fil-junior lyceums u 1,980 fl-iskejjel sekondarji.

Fl-iskejjel hemm ukoll 3,800 għalliem, b'numru minnhom godda. Minn dawn l-għalliema 370 jgħallmu fil-kindergarten, 1,020 fil-primarji u 2,410 fil-livell sekondarju.

Aktar minn 18,000 student ġew trasportati fuq 750 rotta differenti lejn l-iskola bis-sistema ta' trasport pubbliku ghall-iskejjel. Għalkemm kien hemm xi każi isolati (8 rottot) fejn xi rottot ma sarux, saru l-arranġamenti meħtieġa biex dawn ukoll isiru b'mod normali hekk kif l-istudenti jirritornaw lura lejn id-dar. It-trasport tat-tfal lejn l-iskola mexa b'mod normali hekk kif id-Diviżjoni ta' l-Edukazzjoni laħqet ftehim mat-tlett organizzazzjonijiet li jipprovdu t-trasport għall-iskejjel. F'dan il-ftehim id-Diviżjoni qed tizgura li jkun hemm aktar sigurta' għat tfal kemm permezz ta' imġieba tajba min-naħa tas-sewwieqa, kif ukoll billi jiġi assigurat li l-vetturi jinżammu fi stat tajjeb, nadif u skond ir-regolamenti. F'dan il-ftehim ukoll id-Diviżjoni kisbet il-kundizzjoni li t-tfal ma jinġabrux aktar kmieni minn siegħa qabel ma tibda l-iskola u ma jaslux aktar tard minn siegħa wara li tispiċċa l-iskola. Din hi l-ewwel darba li sar ftehim bil-miktub bejn id-Diviżjoni ta' l-Edukazzjoni u l-organizzazzjonijiet tat-trasport pubbliku li fih ukoll klawsoli li jimponu multi f'każ ta' ksur tal-kuntratt.

Il-lezzjonijiet bdew ukoll b'mod normali. Fl-iskejjel hemm tista` tgħid l-għalliema kollha li hemm bżonn. Fejn għadhom ma nstabux għalliema biżżejjed għas-suġġetti tal-Physics, Computer Studies u Home Economics (fejn għad hemm bżonn xi għaxar għalliema) ser jinħarġu s-sejħiet għas-supply teachers. Filwaqt li l-għalliema l-ġodda li se jiggradwaw din is-sena mill-Universita` biex jgħallmu fl-iskejjel primarji ġew ingaġġati kollha, kien hemm numru ta' għalliema ġodda tal-livell sekondarju li għadhom ma ġewx ingaġġati minħabba li m'hemmx vakanzi f'numru ta' suġġetti partikolari (Business Studies, Socjoloġija, Studji Soċjali, Malti, Reliġjon, Franċiż, u Storja).

Il-Ministru Louis Galea żar numru ta' skejjel primarji u sekondarji madwar Malta fejn iltaqa` mal-ġenituri li kienu qed iwasslu lit-tfal għall-ewwel ġurnata skola tagħhom, kif ukoll ma' l-għalliema u t-tfal stess. Il-Ministru żar l-iskejjel primarji ta' Siggiewi, Birkirkara, Bormla, u Birgu, kif ukoll l-iskejjel Maria Regina ta' Blata l-Bajda, Sir Adrian Dingli f'Pembroke u l-iskola tal-Knisja, il-Kulleġġ San Alwiġi f'Birkirkara.

Il-Ministru tkellem mat-tfal dwar l-importanza li jużaw il-ħin tagħhom tajjeb. Huwa qal li jekk it-tfal jużaw il-ħin tagħhom tajjeb isibu ħin għal kollox, kemm għall-istudju kemm għad-divertiment kif ukoll għal attivitajiet kreattivi oħra. Il-Ministru awgura li din is-sena tkun għall-għalliema u għat-tfal sena mimlija entużjażmu u opportunitajiet ta' tagħlim. Il-Ministru tkellem b'mod partikolari dwar l-isfidi li għandhom partikolarment biex iwettqu l-bidliet li qed isiru biex ikun implimentat il-Kurrikulu Nazzjonali.

F'numru ta' skejjel madwar Malta u Għawdex dan is-sajf saru xogħlijiet estensivi biex jitjieb l-ambjent ta' l-iskejjel u dan kien jidher evidenti f'uħud mill-iskejjel li żar il-Ministru. Kemm it-tfal kif ukoll l-għalliema kienu kuntenti ħafna bix-xogħol li sar u f'xi każi qalu li ħassewhom deħlin fi skola ġdida.

Kmieni wara nofs in-nhar il-Ministru iltaqa` mad-Direttur Generali ta' l-Edukazzjoni, is-Sur Charles Mizzi, flimkien mad-Direttrici responsabbli mill-Iskejjel Dr Cecilia Borg, mad-Direttur ta' l-Ippjanar u Infrastruttura s-Sur Joe Magro, u mac-Chief Executive tal-FTS is-Sur Alfred Ferrante. Mir-rapporti li daħlu mill-Kapijiet ta' l-iskejjel kollha tal-Gvern jirriżulta li l-bidu ta' din is-sena skolastika kien wieħed mill-aktar normali.

Il-Ministru Galea irid pubblikament ifisser l-apprezzament tiegħu għall-ħidma kbira li saret matul il-vaganzi tas-sajf biex illum l-iskejjel setgħu jibdew il-ħidma tagħhom b'mod tajjeb. Huwa irringrazzja lill-uffiċċjali kollha tad-Diviżjoni ta' l-Edukazzjoni u lill-Bordijiet u l-impjegati tal-FTS u l-FES. B'mod partikolari il-Ministru radd ħajr lill-ħaddiema industrijali tad-Diviżjoni, u lil dawk tal-Kalaxlokk, Shipbuilding, Tarzna, Koperattivi tal-Gvern u tal-Kuntratturi privati għax-xogħol siewi li wettqu matul is-sajf. Il-Ministru qal li tul is-sajf il-Ministeru u d-Diviżjoni kienu impenjati flimkien ma' l-MUT u l-Assoċjazzjonijiet tat-Trasport Pubbliku f'diskussjonijiet biex isibu soluzzjoni għal kwestjonijiet li kien hemm pendenti. Huwa irringrazzja lill-MUT u lill-Assoċjazzjonijiet tal-kontribut siewi li taw biex instabu is-soluzzjonijiet it-tajba.

Share this Press Release Icon socials Icon socials Icon socials Icon socials

Other Press Releases:

PRESS RELEASE BY THE NATIONAL AUDIT OFFICE  National Audit Office Malta hosts bilateral meeting with the Spanish Court of Audit

PR261929

PRESS RELEASE BY THE NATIONAL AUDIT OFFICE National Audit Office Malta hos...

STQARRIJA MILL-UFFIĊĊJU TAL-PRIM MINISTRU  “Sodisfatt bil-qbil bejn il-mexxejja tal-UE għax Malta ilha mill-bidu nett timbotta favur soluzzjoni għall-paċi” – Il-Prim Ministru Robert Abela

PR261926

STQARRIJA MILL-UFFIĊĊJU TAL-PRIM MINISTRU “Sodisfatt bil-qbil bejn il-mexx...

More Press Releases Right arrow