Left arrow Go Back

Proġett ta’ riabilitazzjoni tal-bitħa ta’ Nettuno fil-Palazz Presidenzjali

PR1262
Date Icon 18/09/2002

Il-Ministru għar-Riżorsi u l-Infrastruttura, l-Onor. Dr. Francis Zammit Dimech qal li x-xogħol fil-Palazz Presidenzjali fil-belt Valletta kien proġett ewlieni għaliex kien jiġbor restawr ta’ xogħol ta’ l-arti, ristrutturazzjoni u xogħol kontinwu ta’ manutenzjoni.

Meta kien qed iżur ix-xogħol ta’ ri-abilitazzjoni li sar fil-bitħa ta’ Nettuno fil-Palazz Presidenzjali, il-Ministru Zammit Dimech qal li bħalisssa qed jitwettqu fil-Palazz tliet proġetti ewlenin ta’ restawr:

  • Restawr ta’ l-affresk ta’ Peres D’Aleccio fis-sala tal-Gran Kunsill;
  • Restawr fil-kamra tal-Paladini; u
  • Restawr tas-saqaf ta’ l-injam fl-istess kamra tal-Paladini.

Il-Ministru Zammit Dimech qal li dawn huma xogħlijiet ta’ l-arti mill-aktar importanti li kien hemm żmien meta ma kenux apprezzati u saritilhom ħsara. Hu qal li llum li l-poplu sar aktar konxju mill-wirt storiku ta’ pajjiżna l-Gvern qed jinvesti bis-sħiħ f’dawn il-ġojjelli ta’ arti, li nħadmu minn artisti ta’ fama li ħallew il-marka tagħhom mhux biss f’Malta iżda wkoll fi bliet kapitali Ewropej u anke ’l bogħod mill-kontinent tagħna. Din il-ħidma kienet tirrikjedi investiment qawwi tant li l-proġett ta’ restawr ta’ l-affresk ta’ Matteo Peres D’Aleccio kien mistenni jiswa madwar Lm80,000.

Il-Ministru għar-Riżorsi u l-Infrastruttura qal li minbarra xogħol ta’ manutenzjoni ta’ kuljum, fil-Palazz jitwettaq ukoll xogħol straordinarju ta’ bdil ta’ soqfa, bdil ta’ ġebel li jkun fi stat ħażin, ftuħ ta’ twieqi u xogħlijiet oħra. Hu qal li din il-ħidma kienet tinkludi ukoll xogħol b’tender għal generator room ġdida u xogħlijiet fl-Uffiċji li kien juża d-Direttorat ta’ l-Unjoni Ewropea, u fuq il-gallerija.

Il-Ministru Francis Zammit Dimech qal li proġett ta’ riabilitazzjoni li qed jitwettaq bħalissa hu dak tal-bitħa prinċipali, il-bitħa ta’ Nettuno. Dan il-proġett jinkludi t-tneħħija ta’ kwalunkwe ħaġa li tagħmel ħsara strutturali lill-istrutturi madwar il-bitħa, l-upgrading tas-servizzi eżistenti bħal katusi biex jieħdu l-ilma tax-xita u dwal ġodda, kif ukoll it-tisbiħ ta’ l-istess bitħa u pavimentar ġdid li jaqbel ma’ l-ambjent.

Il-Ministru għar-Riżorsi u l-Infrastruttura qal li tul is-snin l-art f’din il-bitħa, ‘traqqgħet’ bl-asfalt, partijiet imtlew bil-ħamrija u tħawwlu siġar li qed jagħmlu ħsara lill-istrutturi u l-istabilità tal-kolonni.

Francis Zammit Dimech qal li d-disinn li sar hu maħsub li jsebbaħ din il-bitħa b’tali mod li l-karatteristiċi oriġinali tad-disinn, partikolarment it-transizzjoni bejn l-ispazju ta’ barra u ta’ ġewwa, jiġu konservati u riabilitati. Għalhekk il-kunċett tad-disinn basiku hu bażat fuq stħarriġ storiku. Hu qal li dan il-proġett se joħloq disinn interessanti ta’ pavimentar flimkien ma’ għażla tajba ta’ materjal partikolarment f’dak li hu kobor ta’ madum u kulur li flimkien għandhom jagħtu dehra mill-isbaħ lill-bitħa. Francis Zammit Dimech qal li anke fl-għażla tad-dwal sar minn kollox biex ikun rispettat l-ispazju li hemm u d-dimensjoni taż-żmien. Hu qal li dawn id-dwal se joħorġu d-dehra sabiħa tal-pilastri kif ukoll il-passaġġ mgħotti bil-ħnejjiet li jdawwar il-bitħa. Fid-disinn ingħatat ukoll attenzjoni għas-siġar eżistenti u għat-tħawwil ta’ siġar ġodda li għandhom jagħtu dehra ġdida lil dan l-ispazju miftuħ.

Francis Zammit Dimech qal li dan il-proġett hu smat li jiswa Lm58,000 iżda ma kienx hemm dubju li hu investiment tajjeb fil-wirt storiku ta’ pajjiżna. Il-Ministru Zammit Dimech qal li l-Palazz tul is-snin li ilu mibni, serva biex jilqa’ fih l-ogħla dinjitarji ta’ pajjiżna. Kien il-Palazz tal-Gran Mastri li bnewh u llum hu l-Palazz tal-President ta’ Malta u anke jilqa’ fih il-Parlament tal-pajjiz.

Il-Ministru Zammit Dimech qal li l-Palazz kien ukoll attrazzjoni turistika li jagħti kontribut qawwi biex inkattru t-turiżmu kulturali f’pajjiżna. Dan kollu jagħmel mill-Palazz ċentru storiku u ta’ tmexxija, li jridu jsirulu l-interventi kollha meħtieġa biex iżomm id-dinjità li tixraqlu.

Share this Press Release Icon socials Icon socials Icon socials Icon socials

Other Press Releases:

PRESS RELEASE BY THE NATIONAL AUDIT OFFICE  National Audit Office Malta hosts bilateral meeting with the Spanish Court of Audit

PR261929

PRESS RELEASE BY THE NATIONAL AUDIT OFFICE National Audit Office Malta hos...

STQARRIJA MILL-UFFIĊĊJU TAL-PRIM MINISTRU  “Sodisfatt bil-qbil bejn il-mexxejja tal-UE għax Malta ilha mill-bidu nett timbotta favur soluzzjoni għall-paċi” – Il-Prim Ministru Robert Abela

PR261926

STQARRIJA MILL-UFFIĊĊJU TAL-PRIM MINISTRU “Sodisfatt bil-qbil bejn il-mexx...

More Press Releases Right arrow