Left arrow Mur Lura

‘Saħħaħna Pajjiżna…Biex INT Tgħix Aħjar’

PR1252
Date Icon 16/09/2002

Ħdimna biex illum qed ngħixu aħjar minn qatt qabel

L-inizzjattivi kollha li ħa l-Gvern Nazzjonalista f’dawn l-aħħar erba’ snin kellhom l-għan li kulħadd jikseb kwalita’ ta’ ħajja aħjar, tenna l-Prim Ministru, Eddie Fenecħ Adami, waqt l-ewwel minn sensiela ta’ konferenzi stampa dwar il-ħidma tal-Gvern f’dawn l-aħħar erba’ snin. Hu qal li kemm fuq livell nazzjonali kif ukoll fuq dak lokali, dan il-għan intlaħaq u kien hemm titjib dirett fil-ħajja ta’ kulħadd. "Il-fatti kollha juru li wettaqna titjib sinifikanti fl-oqsma importanti kollha li jolqtu lill-poplu ta’ Malta u l-interessi tiegħu," qal il-Prim Ministru.

Insaħħu l-Familja – il-Pedament tas-Soċjeta’ Maltija

Il-familji, li huma l-pedament tas-soċjeta’ Maltija, ġew imsaħħa b’inizzjattivi ewlenin li ħa l-Gvern fl-oqsma tas-saħħa, ta’ l-edukazzjoni, ta’ l-isport u rikreazzjoni, b’investimenti kontinwi kemm fir-riżorsi umani kif ukoll fl-infrastruttura.

Tkompla l-program ta’ social housing u ta’ tneħħija ta’ slums. F’dawn l-aħħar erba’ snin, l-Awtorita` tad-Djar ħarġet kwazi 900 unit għal bejgħ u s-sussidjat u nediet programm ta’ stallazzjoni ta’ lifts fid-djar tal-Gvern. Fis-sena li ġejja ser jinbnew maisonettes u appartamenti b’nefqa ta’ kważi Lm7 miljun.

Twaqqfu day-care centres għall-anzjani fl-Imtarfa, B’Kara, Bormla, Ħal Luqa w San Pawl il-Baħar. Fir-Residenza San Vincenz de Paule, inbena u nfetaħ is-Serenity Ward li ġie mgħammar bis-servizzi moderni kollha.

Fl-edukazzjoni, l-Gvern ikkommetta Lm60 miljun biex jinbnew skejjel ġodda u jsir xogħol fi skejjel eżistenti. Qed tingħata mportanza lit-tagħlim ta’ l-informatika u l-użu tal-kompjuters fl-iskejjel tal-gvern fil-livelli kollha. Fl-iskejjel primarji hemm komputer għal kull 7 studenti u laptop għal kull għalliem waqt li fi skejjel sekondarji, 95% ta’ l-istudenti għandhom aċċess għall-Internet.

L-isptar l-ġdid, li ser jibda jagħti l-ewwel servizzi s-sena d-dieħla, huwa riflessjoni ta’ kemm dan il-Gvern huwa kommess li jsaħħaħ is-servizzi li jingħata l-poplu.

Opportunitajiet ta’ xogħol għal Kulħadd

Saret ħidma sabiex anki f’dawn iż-żminijiet ta’ bidla jkompli jiżdied ix-xogħol u f’dawn l-aħħar erba’ snin madwar 5,000 persuna sabu xogħol ġdid b’riżultat ta’ 185 proġett tal-Korporazzjoni Maltija għall-Iżvillup. Dawn il-proġetti raw investiment totali li jlaħħaq madwar Lm80 miljun. Fl-istess waqt, il-qagħad niżel b’xi 800 ruħ.

Biex inħejju n-nies għad-dinja tax-xogħol, inħoloq il-Kulleġġ Malti ta’ l-Arti, Xjenza u Teknoloġija li jipprovdi ’l fuq minn disgħin kors differenti. Fil-Kulleġġ hemm jistudjaw madwar 1,600 student u studenta. Il-Korporazzjoni għax-Xogħol u Taħriġ (ETC) żiedet it-taħriġ għal min ikun qed ifittex impjieg jew irid itejjeb ix-xogħol tiegħu.

Fir-Rotta lejn il-Prosperita’

Il-kwistjoni ta’ l-iżbilanċ, u l-implikazzjoni li dan għandu fuq il-prosperita’ tal-pajjiż kien ħasseb lil ħafna. Il-Gvern ħadem biex iserraħ moħħ il-familji Maltin dwar il-futur. Erba’ snin ilu l-iżbilanc kien ilaħħaq 12% tal-Prodott Gross Domestiku. Sa l-aħħar tas-sena 2002, ser naraw aktar progress u dan ser ikun niżel għal madwar 4.6% tal Prodott Gross Domestiku. Dan ifisser li, issa, wieħed jista’ jibda jħares ’il quddiem għal iktar prosperita’.

Serjeta’ fl-Amministrazzjoni

Il-Gvern ħadem biex il-Pulizija tħarrax il-ġlieda kontra l-kriminalita’ u kabbar in-nefqa f’din il-ġlieda. Il-Gvern iqis li d-droga hija l-akbar għadu tal-familja tagħna. Qed jinkisbu riżultati inkoraġġanti fil-ġlieda kontinwa kontra d-droga.

Kull belt jew raħal illum qed igawdu minn sens akbar ta’ identita’ partikulari tagħhom. Dan seħħ billi responsabbilitajiet ġodda, mingħand il-Gvern Ċentrali għaddew għand il-Kunsilli Lokali. B’hekk id-deċiżjonijiet li jaffetwaw in-nies fil-ħajja ta’ kuljum qed jittieħdu fil-lokal stess.

Illum is-servizzi ta’ telekomunikazzjoni saru parti integrali mill-ħajja moderna. Familji Maltin, jistgħu jkunu f’kuntatt ma’ xulxin kullimkien u f’kull ħin. Illum hemm 250,000 telephone ċellulari f’Malta.

Ambjent u Kampanja

Irridu u qegħdin nindirrizzaw il-problemi li writna. Il-problema tal-Magħtab qed tiġi attakkata bit-twettiq tal-Waste Management Plan li jaħseb sabiex f’Malta jkollna sistema li tlaħħaq ma’ l-ammont ta’ skart li nipproduċu.

Fl-istess waqt qegħdin jiġu mħarsa r-riżorsi tal-kampanja u tal-baħar. Il-biedja u s-sajd għandhom ikunu mħarsa għax jifformaw parti integrali mill-ħajja Maltija u dawk involuti f’dawn is-setturi jafu li l-Gvern qed jassigura li jkollna biedja u sajd sostenibbli. Tant hu hekk, li fin-negozjati għal sħubija fl-Unjoni Ewropea akkwistajna d-dritt li nkomplu mmexxu għal żmien indefinit żona ta’ sajd ta’ ħamsa u għoxrin mil madwar Malta bil-għan li tibqa’ sseħħ il-konservazzjoni tal-kwantita’ ta’ ħut fl-ibħra Maltin. Dan il-ftehim barra li jħares lil ħut, iħares l-għejxien tas-sajjieda Maltin. Il-bdiewa qed igawdu minn titjib li qed isir f’toroq rurali waqt li s-sajjieda qed jibbenefikaw minn slipways mgħammra aħjar.

Toroq u Komunikazzjoni

Kulħadd qed jara t-twettiq ta’ programm sħiħ ta’ titjib f’dan il-qasam, bil-ftuħ ta’ toroq ġodda, u titjib f’dawk eżistenti. Matul l-erba’ snin li għaddew, il-Gvern nefaq Lm30 miljun fuq it-toroq - sar xogħol fuq għoxrin triq arterjali u fuq aktar minn 300 triq residenzjali

Proġetti Ewlenin

Numru ta’ lokalitajiet raw titjib fl-ambjent b’rizultat ta’ proġetti ta’ tisbiħ. Dan diġa’ seħħ f’ Tas Sliema, f’San Ġiljan, f’Birżebbuġa u f’Wied il-Għajn. Il-Gvern inkoraġġixxa numru ta’ proġetti kbar b’involviment ta’ investiment qawwi mis-settur privat. Ta’ min isemmi l-proġett tal-Kottonera u l-proġett tal-Manoel Island u l-Ponta ta’ Tigne` u l-Valletta Cruise Harbour Terminal li bejniethom qed jinvestu madwar Lm160 miljun.

Għawdex

Saret ħidma kbira fl-oqsma kollha li jolqtu direttament lill-ħajja ta’ l-Għawdxin – l-edukazzjoni, is-saħħa, ix-xogħol, it-turiżmu, il-kultura w l-isport. Forsi l-aktar ħaġa li tispikka fost ix-xogħol li sar b’konnessjoni m’Għawdex, huwa l-bini tat-tliet vapuri ġodda tal-Gozo Channel. Permezz tagħhom, il-vjaġġ bejn Malta u Għawdex qed isir fl-akbar kumdita` u fl-iqsar żmien. Bħalissa għaddej ix-xogħol fuq il-mollijiet il-godda għal dawn il-vapuri fiċ-Ċirkewwa. Dawn ser jgħinu sabiex Għawdex ikun aċċessibbli matul is-sena kollħa.

Il-Futur

Il-Prim Minstru qal "Aħna lkoll nixtiequ li nkomplu nimxu ’l quddiem. Għamilna differenza, kbira u reali, fl-oqsma kollha li jaffettwaw il-kwalita’ tal-ħajja tal-poplu ta’ dan il-Pajjiż m’hux biss għal-lum imma anki għall-futur," ikkonkluda l-Prim Ministru.

Rapporti dwar il-Ministeri -Rapporti dettaljati dwar il-ħidma ta’ kull Ministeru fir-raba’ sena ta’ dan il-Gvern, 2001/2002, ser ikunu fuq l-internet fuq www.gov.mt.

Ixxerja din l-istqarrija Icon socials Icon socials Icon socials Icon socials

Stqarrijiet Oħra:

PRESS RELEASE BY THE NATIONAL AUDIT OFFICE  National Audit Office Malta hosts bilateral meeting with the Spanish Court of Audit

PR261929

PRESS RELEASE BY THE NATIONAL AUDIT OFFICE National Audit Office Malta hos...

STQARRIJA MILL-UFFIĊĊJU TAL-PRIM MINISTRU  “Sodisfatt bil-qbil bejn il-mexxejja tal-UE għax Malta ilha mill-bidu nett timbotta favur soluzzjoni għall-paċi” – Il-Prim Ministru Robert Abela

PR261926

STQARRIJA MILL-UFFIĊĊJU TAL-PRIM MINISTRU “Sodisfatt bil-qbil bejn il-mexx...

Aktar Stqarrijiet Right arrow