Left arrow Mur Lura

IPPJANAR GĦAL SKOLA SEKONDARJA ĠDIDA FIL-MOSTA

PR1241
Date Icon 13/09/2002

Il-Ministru ta' l-Edukazzjoni Louis Galea ħabbar li l-Fondazzjoni għall-Iskejjel ta' Għada tinsab f'diskussjonijiet mal-MEPA dwar il-bini ta' skola sekondarja ġdida fil-limiti tal-Mosta. Din l-Iskola se taħseb biex tilqa’ għall-bżonnijiet ta' madwar 700 student mill-inħawi tan-naħa ta' fuq ta' Malta. Din ser tkun it-tieni skola ġdida li qed tieħu ħsieb il-Fondazzjoni għall-Iskejjel ta' Għada. L-ewwel skola li ser tinbena mill-Fondazzjoni hi dik tal-Karwija limiti ta' Kirkop/Ħal Safi fejn bħalissa qed issir l-aġġudikazzjoni tat-tender tal-bini mill-Kumitat tal-Kuntratti. Ix-xogħol hu mistenni li jibda qabel l-aħħar ta' din is-sena.

Il-Ministru qal dan waqt żjara li għamel fl-iskejjel Primarji tal-Mosta u ta' Birkirkara fejn sar xogħol ta' tiġdid fil-bini kollu ta' dawn l-iskejjel. Dawn l-iskejjel huma fost madwar 40 skola oħra li dan is-sajf sar xogħol simili fuqhom. Fl-iskejjel Primarji A u B ta' B'Kara sar xogħol ta' tibjid b'kuluri li jidhru aktar attraenti għat-827 tifel u tifla li jattendu dawn l-iskejjel u sar ukoll xogħol estensiv fuq il-boundary wall li kien fi stat ħażin. F'din l-Iskola ngħatat attenzjoni partikolari għad-dekorazzjoni u r-riabilitazzjoni ta' l-ambjenti b'arkitettura aktar storika. Fl-iskola tal-Mosta fejn jattendu mas-664 student sar ukoll xogħol ta' tibjid fl-iskola kollha.

Waqt iż-żjara, il-Ministru semma ix-xogħol siewi li qed isir fl-iskola primarja ta' Marsaxlokk, fejn qed isir tisbieħ tal-faċilitajiet rikreattivi, tibjid ta' l-iskola kollha u qed tiġi indirizzata l-aċċessibilita fl-iskola. Il-Fondazzjoni qed tħejji wkoll il-pjanti ta' sala ġdida li beħsiebha tibni f'din l-iskola għall-użu tat-tfal u tal-kommunita' ta' Marsaxlokk.

Il-Fondazzjoni qed tħejji rapporti (Audits) dwar l-iskejjel tal-Gvern kollha. Minn dawn l-Audits, jitħejja pjan ta' żvilupp għal kull skola individwalment biex kull skola tiġi konformi mar-rekwiżiti tal-Kurrikulu Nazzjonali. B'mod partikolari qed tingħata importanza l-edukazzjoni inklussiva u l-Fondazzjoni ħadet l-inkariku biex tipprovdi l-faċilitajiet meħtieġa f'kull skola fosthom il-provvediment ta' aċċessibilita'.

Għal dan l-iskop diġa inħarġu numru ta' tenders biex jiġu stallati lifts f'diversi skejjel. L-ewwel lifts se jkunu stallati sa l-aħħar ta' din is sena. Sadanittant il-Fondazzjoni qed tieħu ħsieb biex jinbnew il-lift-shafts meħtieġa kif ukoll il-bini ta' rampi skond kif ikun approvat mill-MEPA u għas-sodisfazzjon tal-Kummissjoni Nazzjonali Persuni b'Diżabilita'. Din il-ħidma se tkompli għaddejja matul is-sena skolastika, bi qbil mad-Diviżjoni u l-Kap ta' l-Iskola. Qed jittieħdu l-prekawzjonijiet meħtieġa biex ix-xogħlijiet ma jtellfux l-operat ta' l-iskola u ma jkunu ta' periklu għal ħadd.

Il-Ministru wera l-apprezzament tiegħu għall-ħidma kbira li qed twettaq il-Fondazzjoni u li qed tippjana għax-xhur li ġejjin.

Ixxerja din l-istqarrija Icon socials Icon socials Icon socials Icon socials

Stqarrijiet Oħra:

PRESS RELEASE BY THE NATIONAL AUDIT OFFICE  National Audit Office Malta hosts bilateral meeting with the Spanish Court of Audit

PR261929

PRESS RELEASE BY THE NATIONAL AUDIT OFFICE National Audit Office Malta hos...

STQARRIJA MILL-UFFIĊĊJU TAL-PRIM MINISTRU  “Sodisfatt bil-qbil bejn il-mexxejja tal-UE għax Malta ilha mill-bidu nett timbotta favur soluzzjoni għall-paċi” – Il-Prim Ministru Robert Abela

PR261926

STQARRIJA MILL-UFFIĊĊJU TAL-PRIM MINISTRU “Sodisfatt bil-qbil bejn il-mexx...

Aktar Stqarrijiet Right arrow