Left arrow Mur Lura

MCAST - IT-TIENI SENA TAL-KULLEĠĠ

PR1228
Date Icon 12/09/2002


Ir-rabta bejn l-edukazzjoni, il-kumpaniji u min iħaddem hi essenzjali għas-suċċess edukattiv ta' l-istudenti. Dan qalu il-Ministru ta' l-Edukazzjoni Louis Galea waqt konferenza ta' taħriġ u żvilupp għall-għalliema ta' l-Istitut tan-Negozju u l-Kummerċ tal-Kulleġġ Malti għall-Arti Xjenza u Teknoloġija - MCAST. Din il-Konferenza qed issir għall-istaff akkademiku kollu li jgħallmu f'dan l-istitut u qed ikun hemm ukoll sessjonijiet partikolari għall-għalliema l-ġodda li ngħaqdu ma' dan l-istitut din is-sena. Il-Ministru qal li jieħu pjaċir jinnota li r-rabta bejn l-MCAST u d-dinja tax-xogħol hi waħda b'saħħitha u li qed tagħti l-frott, infatti anke l-konferenza stess kienet qed issir bil-kollaborazzjoni tal-Bank of Valletta.

Il-Konferenza qed tiffoka fuq temi importanti li jinkludu l-kwalità fl-edukazzjoni vokazzjonali li toffri l-MCAST u l-istandards ta' kwalità fl-assessjar u fl-iżvilupp kurrikulari. Il-Konferenza se tkun ukoll opportunità għall-għalliema biex iqabblu l-istandards lokali ma dawk ta' skejjel oħra vokazzjonali madwar id-dinja, kif ukoll jaraw eżempji tajba f'dan il-qasam u jaqsmu dawn l-esperjenzi ma’ xulxin.

Il-Konferenza hi parti mill-programm ta' żvilupp li għandu dan l-Istitut kemm għall-għalliema kif ukoll għall-istudenti. L-Istitut qed jorganizza sessjonijiet ta' introduzzjoni għall-istudenti kollha f'kull kors li joffri l-kulleġġ. Waqt dawn is-sessjonijiet l-istudenti jingħataw l-informazzjoni kollha meħtieġa kif ukoll Handbook bid-dettalji kollha biex ikunu jistgħu jibdew is-sena skolastika mingħajr diffikultajiet. Il-Kulleġġ qed joffri wkoll servizz ta' Guidance and Counselling biex jagħti appoġġ lill-istudenti kemm akkademikament kif ukoll soċjalment. Għall-għalliema, l-Istitut organizza sessjonijiet fejn l-għalliema iltaqgħu ma' min iħaddem biex ikun hemm dejjem aktar tagħlim relevanti għad-dinja tax-xogħol, l-għalliema li jgħallmu suġġetti tal-MATSEC iltaqgħu ukoll mal-MATSEC biex ikun hemm koordinament bejn l-għalliema u l-eżaminaturi, u saru wkoll sessjonijiet partikolari għal dawk li jgħallmu korsijiet BTEC u AAT u l-għalliema tal-Matematika.

Qed isir ukoll programm ta' żvilupp u taħriġ fl-Istituti l-oħra li bejniethom jimpjegaw 219-il għalliem u 63 persuna fl-amministrazzjoni tal-Kulleġġ.

Din l-attività hi biss waħda mill-attivitajiet li qed jiġu organizzati mill-Istituti differenti li hemm fl-MCAST. L-MCAST li fetaħ il-bibien tiegħu għall-ewwel darba f’Ottubru li għadda (2001) b’sitt istituti: l-Istitut ta’ l-Inġinerija Elettronika; ta’ l-Inġinerija tal-Bini u Kostruzzjoni; tan-Negozju u Kummerċ; tat-Teknoloġija ta’ l-Informatika u l-Kommunikazzjoni; ta’ l-Arti u Disinn u l-Istitut Marittimu. F’Ottubru li għadda, mill-1300 student li applikaw daħlu qrib 1000 student, 366 minnhom daħlu fl-Istitut tan-Negozju u Kummerċ.

L-MCAST din is-sena diġà fetaħ l-applikazzjonijiet għat-30 kors full-time li joffru l-Istituti tiegħu. Għall-din l-ewwel sejħa applikaw aktar minn 1600 persuna jiġifieri aktar minn 300 persuna aktar mis-sena li għaddiet. Fi żmien ftit ġranet oħra hu mistenni li toħroġ it-tieni sejħa wara li joħorġu r-riżultati tar-reparatorji tal-MATSEC. Il-Kulleġġ din is-sena żied in-numru ta’ korsijiet li joffri, kif ukoll fetaħ ċentru f’Għawdex b’aktar korsijiet għall-Għawdxin fil-gżira tagħhom stess. Madankollu, il-kulleġġ li għadu fil-bidu tiegħu, mhux se jkun jista’ jilqa’ l-applikazzjonijiet kollha li għandu minħabba il-limitazzjonijiet tar-riżorsi li jeżistu għalkemm qed isir dak kollhu possibbli biex ir-riżorsi jiġu utilizzati sal-massimu tagħhom.

L-MCAST għandu numru ta’ korsijiet ta’ bażi (Foundation Courses) li għalihom m’hemmx bżonn kwalifiki jew ‘O’ levels u minn din is-sena l-applikazzjonijiet qed jintlaqgħu minn kulħadd. Bħalissa l-MCAST qed jagħmel aptitude tests biex ikun jista’ jagħżel l-istudenti għal dawn il-korsijiet li għalihom applikaw aktar minn 300 persuna.

Il-Ministru f’diskors li għamel tkellem dwar l-iżviluppi li għaddej minnhom bħalissa l-MCAST. Hu qal li l-MCAST għadu biss fil-bidu tal-ħidma tiegħu u għad fadal ħafna biex nilħqu d-daqs u l-livell mixtieq u meħtieġ għall-ekonomija tagħna. Il-Ministru qal li l-MCAST qed tagħmel l-arranġamenti meħtieġa biex mis-sena d-dieħla jinfetħu erba’ Istituti oħra li huma l-Istitut ta’ l-Agrikummerċ, ta' l-Inġinerija Mekkanika, ta' l-Inġinerija Elettrika u dak tas-Servizzi fil-Komunità.

Il-Ministru qal li l-MCAST qed jinvesti ħafna biex itejjeb il-kwalità tar-riżorsi li għandu. Il-Ministru semma li fl-MCAST infetħu 5 laboratorji ġodda tal-kompjuters u minn din is-sena l-istudenti li jattendu se jkollhom spażju li se jintuża bħala bookshop u bħala librerija u ċentru tar-riżorsi. F'dan l-ispażju l-istudenti se jkollhom kompjuters b'aċċess għall-internet minn fejn ikunu jistgħu jiksbu informazzjoni u materjal edukattiv, kif ukoll jixtru l-kotba minn fuq l-internet.

Il-Ministru qal li l-MCAST fl-ewwel sena tiegħu irnexxielu jibda jgħolli l-istatura tat-tagħlim vokazzjonali kif ukoll beda jimla vojt li kien ilhu jinħass għal dawn l-aħħar snin. Il-Ministru qal l-MCAST żviluppa u jrid ikompli jiżviluppa identità ċara ta' istituzzjoni ta' livell għoli li tħarreġ żgħażagħ u adulti f'suġġetti vokazzjonali li huma relevanti u meħtieġa fid-dinja tax-xogħol llum u fil-futur. Hu tenna li l-MCAST issa beda wkoll joffri 60 kors part-time li huma immirati l-aktar għaż-żgħażagħ u l-adulti li diġà qed jaħdmu u li jixtiequ jkomplu jitħarrġu jew jibdew jitħarrġu f'qasam differenti. Il-Ministru qal li b'hekk il-Kulleġġ ikun qed iwettaq rwol ieħor li għandu jkollu l-kulleġġ, dak li joffri opportunitajiet ta' edukazzjoni tul il-ħajja, li jgħin fir-ristrutturazzjoni ta' l-industriji u li jipprovdi ċans ieħor lill-dawk li waqfu jitħarrġu.

Il-Ministru temm jgħid li l-Gvern u l-MCAST jemmnu ħafna fit-taħriġ ta' l-għalliema u l-istaff. Il-Ministru qal li l-MCAST qed jgħin anke finanzjarjament lil numru ta' għalliema ikomplu l-istudji tagħhom. Fl-Istitut tan-Negozju u l-Kummerċ biss hemm ħames għalliema li qed isegwu korsijiet ta' Masters. Din is-sena l-MCAST ivvota Lm 25,000 għat-taħriġ u l-iżvilupp ta' l-istaff tal-kulleġġ.

Ixxerja din l-istqarrija Icon socials Icon socials Icon socials Icon socials

Stqarrijiet Oħra:

PRESS RELEASE BY THE NATIONAL AUDIT OFFICE  National Audit Office Malta hosts bilateral meeting with the Spanish Court of Audit

PR261929

PRESS RELEASE BY THE NATIONAL AUDIT OFFICE National Audit Office Malta hos...

STQARRIJA MILL-UFFIĊĊJU TAL-PRIM MINISTRU  “Sodisfatt bil-qbil bejn il-mexxejja tal-UE għax Malta ilha mill-bidu nett timbotta favur soluzzjoni għall-paċi” – Il-Prim Ministru Robert Abela

PR261926

STQARRIJA MILL-UFFIĊĊJU TAL-PRIM MINISTRU “Sodisfatt bil-qbil bejn il-mexx...

Aktar Stqarrijiet Right arrow