IMFAKKAR JUM IR-REPUBBLIKA F'GĦAWDEX

L-Onor. Giovanna Debono, Ministru għal Għawdex, ppresediet l-attivitajiet organizzati f'Għawdex sabiex jiġi mfakkar is-27 anniversarju ta' Malta Repubblika.

Iċ-ċerimonja ngħatat bidu mill-Banda tal-Pulizija illi akkumpanjat il-wasla ta' l-Onor. Ministru fi Pjazza Indipendenza, Victoria. L-attivita` laħqet il-qofol tagħha permezz tat-tqegħid ta' fjuri mal-Lapida kommemorattiva li tfakkar il-jum ta' nhar it-13 ta' Diċembru 1974. Waqt l-istess ċerimonja l-Banda tal-Pulizija eżegwiet programm mużikali illi wasal fi tmiemu bid-daqq ta' l-Innu Malti. Wara, il-Banda tal-Pulizija eżegwiet marċ minn Pjazza Indipendenza sa Pjazza San Franġisk fejn akkumpanjat il-wasla tal-President ta' Malta, il-Prof. Guido de Marco.

Iktar tard wara ċ-ċerimonja, il-President ta' Malta, il-Prof. Guido de Marco u s-Sinjura de Marco taw riċeviment f'okkażjoni ta' Jum ir-Repubblika ġewwa s-Swali ta' l-Esibizzjonijiet, fil-Ministeru għal Għawdex.