L-Ambaxxaturi tal-Panama u ta' l-Ekwador residenti f'Ruma jzuru Malta biex jipprezentaw il-Kredenzjali

L-E.T. is-Sur Riccardo Antonio Dunque Jaen u l-E.T. is-Sur Alfredo Luna Tobar, jinsabu Malta biex jipprezentaw il-Kredenzjali taghhom bhala Ambaxxaturi tal-Panama u l-Ekwador rispettivament.

Illum wara nofsinhar, iz-zewg Ambaxxaturi kellhom laqgha separata ma' l-Onorevoli Dr. George W. Vella, Vici Prim Ministru u Ministru ta' l-Affarijiet Barranin u ta' l-Ambjent.

Waqt dawn il-laqghat, giet diskussa s-sitwazzjoni politika w ekonomika ta' Malta, kif ukoll taz-zewg pajjizi latini Amerikani. Il-Vici Prim Ministru sostna li ghalkemm geografikament imbeghdin minn xulxin, hemm lok ghal aktar tishih fir-relazzjonijiet kemm politici kif ukoll dawk kummercjali. Dawn jinkludu s-settur turistiku u dak marittimu. Mil-lat politiku, il-Vici Prim Ministru sahaq li ghandu jkun hemm aktar kuntatti u kooperazzjoni specjalment fi hdan il-grupp ta' pajjizi mhux allinejati, li kemm Malta kif ukoll il-Panama u l-Ekwador huma membri attivi tieghu.

Din hi l-ewwel darba li Ambaxxatur mill-Ekwador ser ikun akkreditat ghal Malta mit-twaqqif tar-relazzjonijiet diplomatici bejn iz-zewg pajjizi fl-1980.